ನಿಮ್ಮ ಮನೆಯಲ್ಲಿ ರೂಮ್ ಫ್ರೆಶ್ನರ್‌ ಬಳಕೆ  ತಜ್ಞರು ಎಚ್ಚರಿಕೆಗಳೇನು?

ಬಹುತೇಕರ ಮನೆಗಳಲ್ಲಿ ರೂಮ್ ಫ್ರೆಶ್ನರ್‌ಗಳ ಬಳಕೆ ಮಾಡುವುದು ಗಮನಾರ್ಹವಾಗಿ ಹೆಚ್ಚಾಗಿದೆ. ಅಹಿತಕರ ವಾಸನೆಯನ್ನು ಮರೆಮಾಚಲು, ಸಂಬಂಧಿಕರ ಭೇಟಿ ನೀಡುವ ಹಿನ್ನೆಲೆಯಲ್ಲಿ ತಾಜಾ ಪರಿಮಳವನ್ನು ಹರಡಲು ಇತರೆ ಕಾರಣಗಳಿಗಾಗಿ ರೂಮ್ ಫ್ರೆಶ್ನರ್‌ ಹೆಚ್ಚಾಗಿ ಉಪಯೋಗ ಮಾಡಲಾಗುತ್ತದೆ.

ರೂಮ್ ಫ್ರೆಶ್ನರ್‌ ವಿವಿಧ ರೀತಿಯ ಸುಗಂಧ ದ್ರವ್ಯಗಳಲ್ಲಿ ಲಭ್ಯವಿರುವುದರಿಂದ, ಇವುಗಳನ್ನು ಕೊಠಡಿಗಳಲ್ಲಿ ಮಾತ್ರವಲ್ಲದೆ ವಾಹನಗಳಲ್ಲಿಯೂ ವ್ಯಾಪಕವಾಗಿ ಬಳಕೆ ಮಾಡಲಾಗುತ್ತಿದೆ. ಸ್ಟೋರ್ ರೂಮ್‌ಗಳು ಅಥವಾ ಸ್ನಾನಗೃಹಗಳಂತಹ ಪ್ರದೇಶಗಳಲ್ಲಿ ಸಾಂದರ್ಭಿಕ ಬಳಕೆಯು ಗಮನಾರ್ಹ ಪರಿಣಾಮ ಬೀರದಿದ್ದರೂ, ನಾವು ಹೆಚ್ಚು ಸಮಯ ಕಳೆಯುವ ಸ್ಥಳಗಳಲ್ಲಿ ಆಗಾಗ್ಗೆ ಬಳಸಬಾರದು ಎಂದು ತಜ್ಞರು ಸಲಹೆ ನೀಡುತ್ತಾರೆ.

ಮಾರುಕಟ್ಟೆಯಲ್ಲಿ ಲಭ್ಯವಿರುವ ಕೃತಕ ಸುಗಂಧ ದ್ರವ್ಯಗಳು ತಾತ್ಕಾಲಿಕ ಆಹ್ಲಾದಕರ ಪರಿಮಳ ಒದಗಿಸುತ್ತವೆಯಾದರೂ ದೀರ್ಘಕಾಲೀನ ಬಳಕೆಯು ವಿವಿಧ ಅಲರ್ಜಿಗಳನ್ನು ಪ್ರಚೋದಿಸಬಹುದು ಎಂದು ಎಚ್ಚರಿಕೆ ನೀಡುತ್ತಾರೆ.

ರೂಮ್ ಫ್ರೆಶ್ನರ್‌ ವಿಧಗಳಿವು: ರೂಮ್ ಫ್ರೆಶ್ನರ್​ಗಳು ಹಲವು ರೂಪಗಳಲ್ಲಿ ಬರುತ್ತವೆ. ಸ್ಪ್ರೇ ಬಾಟಲಿಗಳು, ಮೇಣದಬತ್ತಿಗಳು, ಧೂಪದ್ರವ್ಯದ ಕಡ್ಡಿಗಳು, ಕೋಣೆಯ ಉಷ್ಣಾಂಶದಲ್ಲಿ ಸುಗಂಧ ಬಿಡುಗಡೆ ಮಾಡುವ ಸ್ಯಾಚೆಟ್‌ಗಳು, ಚೆಂಡುಗಳು, ಕಣಗಳು ಹಾಗೂ ಸ್ಟಿಕ್ಕರ್‌ಗಳು ಸೇರಿವೆ. ಸ್ಪ್ರೇಗಳು ಹಾಗೂ ಸುಡುವ ಅಗತ್ಯವಿರುವ ಉತ್ಪನ್ನಗಳು ಸೇರಿದಂತೆ ಇವೆಲ್ಲವೂ ಆರೋಗ್ಯಕ್ಕೆ ಹಾನಿಕಾರಕವಾಗಬಹುದು ಎಂದು ಆರೋಗ್ಯ ತಜ್ಞರು ಹೇಳುತ್ತಾರೆ.

ಅತಿಯಾದ ರೂಮ್ ಫ್ರೆಶ್ನರ್‌ ಬಳಕೆಯ ಪರಿಣಾಮಗಳೇನು?: ರೂಮ್ ಫ್ರೆಶ್ನರ್‌ಗಳು ಥಾಲೇಟ್‌ಗಳು (ಸಂಶ್ಲೇಷಿತ ರಾಸಾಯನಿಕಗಳ ಮಿಶ್ರಣ) ಮತ್ತು ಬಾಷ್ಪಶೀಲ ರಾಸಾಯನಿಕ ಸಂಯುಕ್ತಗಳನ್ನು ಹೊಂದಿರುತ್ತವೆ. ಕೆಲವು ಲೇಬಲ್‌ಗಳು ಥಾಲೇಟ್‌ಗಳು ಎಂದು ಸ್ಪಷ್ಟವಾಗಿ ಹೇಳುವ ಬದಲು DEP, DBP, ಅಥವಾ ಸರಳವಾಗಿ ಪ್ಲಾಸ್ಟಿಸೈಜರ್ ಎಂದು ಪಟ್ಟಿ ಮಾಡಿವೆ ಎಂದು ವರದಿಯಾಗಿದೆ. ಈ ಥಾಲೇಟ್‌ಗಳು ಅಪೇಕ್ಷಿತ ಪರಿಮಳವನ್ನು ಉಳಿಸಿಕೊಳ್ಳಲು ಸಹಾಯ ಮಾಡುತ್ತದೆ. ಸುಗಂಧವು ಹೆಚ್ಚು ಕಾಲ ಉಳಿಯುತ್ತದೆ ಎಂದು ಖಚಿತಪಡಿಸುತ್ತದೆ. ಆಗಾಗ ಬಳಸುವುದರಿಂದ ಹಾರ್ಮೋನುಗಳ ಅಸಮತೋಲನ ಮತ್ತು ಫಲವತ್ತತೆ ಸಮಸ್ಯೆಗಳಿಗೆ ಕಾರಣವಾಗಬಹುದು ಎಂದು ತಜ್ಞರು ಹೇಳುತ್ತಾರೆ.

ಅನೇಕ ಏರ್ ಫ್ರೆಶ್ನರ್‌ಗಳು ಮೀಥೈಲ್‌ಪ್ಯಾರಬೆನ್, ಪ್ರೊಪಿಲ್‌ಪ್ಯಾರಬೆನ್ ಹಾಗೂ ಫಾರ್ಮಾಲ್ಡಿಹೈಡ್ ಅನ್ನು ಹೊಂದಿರುತ್ತವೆ ಎಂದು ವರದಿಯಾಗಿದೆ. ಈ ಪದಾರ್ಥಗಳು ಸುಗಂಧವು ದೀರ್ಘಕಾಲದವರೆಗೆ ಉಳಿಯಲು ಸಹಾಯ ಮಾಡುತ್ತದೆ ಎಂದು ತಜ್ಞರು ಗಮನಿಸುತ್ತಾರೆ. ಈ ವಸ್ತುಗಳು ನೇರವಾಗಿ ಹಾರ್ಮೋನುಗಳ ಮೇಲೆ ಪರಿಣಾಮ ಬೀರುತ್ತವೆ ಮತ್ತು ಮಕ್ಕಳ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತವೆ ಎಂದು ಆರೋಗ್ಯ ತಜ್ಞರು ತಿಳಿಸುತ್ತಾರೆ.