ದವಸ-ಧಾನ್ಯ, ನಾಣ್ಯಗಳಲ್ಲ; ರಕ್ತದ ತುಲಾಭಾರ

ಶಾಸಕ‌ ಶ್ರೀನಿವಾಸ ಮಾನೆ ಹುಟ್ಟುಹಬ್ಬಕ್ಕೆ ಹಿಂದೂ, ಮುಸ್ಲಿಂ, ಕ್ರೈಸ್ತ ಧರ್ಮಗುರುಗಳಿಗೆ ರಕ್ತ ತುಲಾಭಾರ

ಹಾವೇರಿ: ಸಾಮಾನ್ಯವಾಗಿ ದವಸ-ಧಾನ್ಯಗಳು‌ ಮತ್ತು ನಾಣ್ಯಗಳನ್ನಿಟ್ಟು ತುಲಾಭಾರ ಮಾಡುವುದನ್ನು ನೋಡಿದ್ದೇವೆ. ಆದರೆ ಹಾನಗಲ್ ಕ್ಷೇತ್ರದ ಶಾಸಕ‌ ಶ್ರೀನಿವಾಸ ಮಾನೆ ಅವರ 52ನೇ ಹುಟ್ಟುಹಬ್ಬದ ಪ್ರಯುಕ್ತ ಅವರ ಅಭಿಮಾನಿಗಳು ಹಿಂದೂ, ಮುಸ್ಲಿಂ ಹಾಗೂ ಕ್ರೈಸ್ತ ಧರ್ಮ ಗುರುಗಳಿಗೆ ರಕ್ತದ ತುಲಾಭಾರ ಮಾಡಿ ಗಮನ ಸೆಳೆದರು.

ತುಲಾಭಾರ ರಕ್ತದಾನ ಶಿಬಿರದಲ್ಲಿ ಸುಮಾರು 901 ಜನರು ರಕ್ತದಾನ ಮಾಡಿದರು. ಹುಬ್ಬಳ್ಳಿಯ ಮೂರು ಸಾವಿರ ಮಠದ ಗುರುಸಿದ್ದರಾಜಯೋಗೀಂದ್ರ ಸ್ವಾಮೀಜಿ, ಮುಸ್ಲಿಂ ಧರ್ಮಗುರು ಮತ್ತು ಕ್ರೈಸ್ತ ಧರ್ಮ ಗುರುಗಳಿಗೆ ತುಲಾಭಾರ ಮಾಡಿ, ಭಾವೈಕ್ಯತೆ ಮೆರೆಯಲಾಯಿತು.

901 ಮಂದಿಯಿಂದ ರಕ್ತದಾನ:

ಹಾನಗಲ್ ತಾಲೂಕಿನ ವಿವಿಧಡೆ ಬೆಳಗ್ಗೆಯಿಂದಲೇ ರಕ್ತದಾನ ಶಿಬಿರ ಮತ್ತು ಆರೋಗ್ಯ ತಪಾಸಣೆ ಕಾರ್ಯಕ್ರಮ ಆಯೋಜಿಸಲಾಗಿತ್ತು. ಹಾನಗಲ್ ಪಟ್ಟಣದಲ್ಲಿ 82 ಮಂದಿ, ಬೊಮ್ಮನಹಳ್ಳಿಯಲ್ಲಿ 100 ಮಂದಿ, ಹಿರೂರು 115 ಮಂದಿ, ಬೆಳಗಾಲಪೇಟೆ 74, ಅಕ್ಕಿಆಲೂರು 136, ಆಡೂರು 148, ತಿಳವಳ್ಳಿ 109, ಕಿಮ್ಸ್ ಹುಬ್ಬಳ್ಳಿ 101, ಧಾರವಾಡ 36 ಹೀಗೆ ಒಟ್ಟು 901 ಮಂದಿ ರಕ್ತದಾನ ಮಾಡಿದರು.